- ८ करोडको कारोवार, १ लाख दर्शक लक्ष्य
विजुवार (प्यूठान) : फागुन ८ देखि संचालन हुने स्वर्गद्धारी प्यूठान चौथो महोत्सवमा ८ करोड बरावरको आर्थिक कारोवार र एक लाख दर्शकले अवलोकन गर्ने लक्ष्य लिइएको छ । मुख्य आयोजक प्यूठान उद्योग वाणिज्य संघले शनिवार जुम्रिमा पत्रकार सम्मेलन गरी उक्त योजना सार्वजनिक गरेको हो । महोत्सवको मिति नजिकिए पनि आयोजकले पहिलो पटक पत्रकार सम्मेलन गरी योजना सुनाएको हो ।
महोत्सवमा विभिन्न विधाका गरी २ सय ५० वटा स्टलहरु रहने प्यूठान उद्योग वाणिज्य संघका अध्यक्ष केदारमान कक्षपतीले जानकारी गराए । जिल्लाको कृषि, पर्यटन, ऊर्जा र औद्योगिक क्षेत्रको प्रवद्र्धन र लगानीमैत्री वातावरणका लागि राज्यको ध्यानार्षण गराउने उद्देश्यले महोत्सव संचालन गर्न थालिएको कक्षपतीले बताए ।
भारतको सिमानामा रहेको कोइलाबासदेखि प्यूठान हुँदै मुस्ताङको मुक्तीनाथबाट चीन जोड्ने त्रिदेशिय मार्ग, स्वर्गद्धारी विमानस्थल निर्माण, झिमरुक नदी करीडोर ग्रीन सडक निर्माण र च्याम्वर मार्गको रुपमा रहेको सदरमुकाम खलंगा जोड्ने थापडाँडा–विजुवार सडक कालोपत्रे गर्न सरकारको ध्यानार्षण गराउने आयोजकले जनाएको छ ।
महोत्सवबाट भएको आम्दानीले प्यूठानमा सुविधायूक्त वाणिज्य सभाहल निर्माण गरिने योजना रहेको संघले जनाएको छ । नेपाल भ्रमण वर्ष २०२० कै चरणमा संचालनमा गरिएको महोत्सवले पर्यटकहरुलाई भित्र्याउन महत्वपूर्ण भूमिका निर्वाह गर्ने आशा गरिएको छ । यसअघि संघकै आयोजनामा ०६५, ०६८, ०७१ (मध्यपश्चिम स्तरीय) र ०७४ मा महोत्सव सम्पन्न भएका छन् ।
यसअघि भएको महोत्सबाट गराइएको ध्यानाकर्षणकै कारण निर्माणधिन स्वर्गद्धारी सडक कालोपत्रे, थापडाँडा–खलंगा सडक च्याम्वर मार्ग नामाकरण लगाएत योजनाहरु अघि बढेका छन् । महोत्सवलाई मनोरञ्जनमा मात्र सिमित नबनाउन आयोजकलाई जिल्लाबासीले सुझाव दिएका छन् । स्थानीय उत्पादनको बजारीकरण र समग्र जिल्लाको आर्थिक गतिविधिमा टेवा पुग्नेगरी महोत्सव संचालन गर्न आयोजकलाई प्यूठानबासीले सुझाव दिएका छन् ।
महोत्सवमै निःशुल्क फोरजी सिमकार्ड
महोत्सव स्थलमा नेपाल टेलिकमले फोरजी सिमकार्ड निःशुल्क उपलव्ध गराउने भएको छ । फोरजी सेवा नभएका सिमकार्ड लाई समेत निःशुल्क परिवर्तन गरिने टेलिकमले जनाएको छ ।
