काठमाण्डौँ : नेपाल पत्रकार महासंघले गरेको सदस्यता शुद्धीकरणप्रति देशभर विरोध भइरहेको छ । ‘नेपाल पत्रकार महासंघको सदस्यता शुद्धीकरण मापदण्ड २०७९’ विपरित भएको भन्दै देशभरका पत्रकारहरुले विरोध जनाएका हुन् । अधिकांश जिल्ला शाखाहरुमा ताला लागेको छ । महासंघको केन्द्रीय कार्यालयमा समेत प्रेस चौतारी नेपाल र नेपाल प्रेस यूनियनले ताला लगाएका छन् ।
महासंघको नेतृत्वले जिल्ला र प्रदेश समितिबाट नवीकरण र नयाँ सदस्यता प्राप्तीका लागि पठाएको सिफारिस विपरित शुद्धीकरण गरेको भन्दै आलोचना बढेको हो । शुद्धीकरण मापदण्डलाई समितिले पुरै कुल्चिएको पाइएको छ । अधिकांश जिल्लाहरुमा पत्रकारितामै लामो समयदेखि क्रियाशिल रहेका सदस्यहरुको सदस्यता नविकरण नगर्ने र पत्रकारिता बाहेक अन्य क्षेत्रमा सक्रिय सदस्यहरुको सदस्यता नविकरण गरिएको छ ।
मापदण्ड भन्दा सदस्यता शुद्धीकरण जिल्ला÷जिल्ला अनुसार फरक देखिएको छ । एउटै प्रकृतिको सदस्य कतै राखिएको छ भने कतै हटाइएको छ । पत्रकार महासंघको सदस्यताको विवाद पार्टीको नेतृत्व तहसम्म समेत पुगेको पाइएको छ । पार्टीका शिर्ष नेताहरुले समेत आफू अनुकुलका सदस्यहरुको नविकरण गर्नका लागि दबाव दिने गरेका छन् । शुद्धीकरण विवाद लम्बिदै गएपछि जेठ २६ गते देशभर एकैपटक हुने भनिएको महासंघको निर्वाचन अन्यौल हुने देखिएको छ ।
महासंघले ठेकेदार, स्थायी, अस्थायी, करारका कर्मचारी, पार्टीका नेता, विद्यार्थी संगठनका नेता, व्यापारी, पत्रिकाका व्यवस्थापक, प्रवन्धक लगायतको सदस्यता नविकरण गरेको छ । तर, सक्रिय पत्रकारिता गरेकाहरुको सदस्यता नविकरण गरेको छैन् ।
२०७९ चैत १६ र १७ गते सम्पन्न केन्द्रीय समिति बैठक तथा राष्ट्रिय मिडिया सम्मेलनमा सदस्यता शुद्धीकरणका लागि २०७९ पुस ८ र ९ गते सुर्खेतमा सम्पन्न केन्द्रीय साधारणसभाको म्यान्डेटअनुसार गठित शुद्धीकरण समितिले प्रस्तुत गरेको कार्यविधि तथा मापदण्ड उपर व्यापक छलफल गरी प्राप्त सुझावलाई समेटेर ‘सदस्यता शुद्धीकरण मापदण्ड–२०७९’ बनाइएको थियो ।
यस्तो छ सदस्यता शुद्धीकरण मापदण्ड–२०७९
१. पत्रकारिताक्षेत्रमा तीन वर्षदेखि सक्रिय नभएको ।
२. राजनीतिक दलको कुनै समितिको पदाधिकारी रहेको ।
३. जनप्रतिनिधि रहेको ।
४. सरकारी तथा सेवा आयोग स्थायी, अस्थायी र करार सेवाको कर्मचारी ।
५. मिडिया संस्थान बाहेक अन्य संस्थाका कर्मचारी ।
६. कहिलेकाही मात्र पत्रकारिता गर्ने, गैरसरकारी तथा वित्तियक्षेत्रका कर्मचारी ।
७. मुख्य पेशा पत्रकारिता वाहेक अन्य रहेका ।
८. संचारमाध्यममा बिशुद्ध व्यवस्थापक, वजार प्रतिनिधि र प्रशासनिक कर्मचारी ।
९. ६ महिना भन्दा लामो समयदेखि विदेशमा रहेका ।
-page-001-1716864056.jpg)
-page-002-1716864056.jpg)
