प्यूठान : प्यूठान अस्पताल विजुवार जाने मुखैको बाटो विग्रेको वर्षौ हुँदा पनि मर्मतमा सरकारको नजर नपुगेपछि स्थानीय सचेत यूवाहरु मिलेर बाटो मर्मत गरेका छन् । थोरै लगानीमा पनि मर्मत गर्न सकिने बाटोलाई घरदैलोको स्थानीय सरकार प्यूठान नगरपालिकाले देखेपनि नदेखेजस्तै गरेर ‘सुतेर’ आराम गरिरहेको यूवाहरुले आरोप लगाएका छन् ।
स्वास्थ्यजस्तो संवेदनशिल क्षेत्रमा पुग्ने सडकको दुर्दशा आफूहरुले देख्न नसकेर मर्मत गरिएको उनीहरुको प्रतिक्रिया छ ।
बाटो मर्मत नहुँदा एम्बुलेन्सहरुलाई आवाजजावत गर्न निकै समस्या हुँदै आएको थियो । बाटोमा आरसिसी ढलान उप्केको, खाल्डा खुल्डी, छरपस्ट देखिने सरियाले समस्या बनाएको थियो ।
बाटो बनाउँदा नै कमसल काम भएको देखिएको स्थानीय विजुवारका यूवा सुमन सुवेदीले बताए । ‘बालुवा, गिट्टी, पानी र माटोको मात्रै मिश्रण देखियो’,सुवेदीले भने, ‘गुणस्तरहीन काम भएको देखियो ।’
विग्रिएको बाटो मर्मतमा स्थानीय यूवाहरु मनु लामा, सुमन सुवेदी, चन्द्रमान श्रेष्ठ, मुकेश थापा, हरि बस्नेत, बिरबल केसी, जीवन खनाल र निवर्तमान प्यूठान नगरपालिकाका नगरप्रमुख कुमार कक्षपती समेतका स्थानीयहरुले श्रमदान गरेका छन् । प्यूठान अस्पताल प्रशासनले सिमेन्ट उपलब्ध गराएको थियो ।
घरदैलोको स्थानीय सरकारले समस्या समाधानमा ध्यान नदिनु नागरिकहरुको स्वास्थ्यमा गम्भिर खेलबाड गरिएको स्थानीय यूवा मुकेश थापाले प्रतिक्रिया दिए । नागरिकका समस्या प्रति स्थानीय सरकार जिम्मेवार र जवाफदेही बनेर काम गर्न उनले आग्रह गरे । दैनिक सयौँको संख्यामा यस सडक भएर अस्पतालमा सवारीसाधन ओहोरदोहोर गर्ने गर्छन् ।
