विजुवार (प्यूठान) : चुनाव जितेर प्यूठानीको प्रतिनिधी भएर गइसकेपछि जिल्लाको समग्र विकासमा आफूले योगदान दिन नसकेको प्रतिनिधीसभा सदस्यका उम्मेदवार दुर्गा पौडेलले स्वीकार गरेकी छिन् । गठबन्धन निकटका पत्रकारहरुको संगठनले मंगलवार विजुवारमा आयोजना गरेको पत्रकार भेटघाट कार्यक्रममा बोल्दै पौडेलले पटक पटक संसद् विघटन र कोभिडको बाहाना देखाउँदै आफुले सोचेँ अनुसार प्यूठानको विकास गर्न नसकेको स्पष्ट पारिन् ।
पाँच बर्षमा जिल्लामा गर्नुभएको बिकास निर्माणका काम के रहे ? फेरी तपाईंको उम्मेदवारी के का लागि ? भन्ने प्रत्रकारहरुको प्रश्नको जवाफ दिँदै पौडेलले भनिन्,‘तपाईहरुको प्रश्नमा सहमत छु, जनताले जिताएर पठाएपनि विविध कारणले बिकासमा योगदान गर्न सकिन । यद्यपी, धेरै काम भएका छन, केही काम अँधुरा छन् । ती काम पूरा गर्नका लागि मेरो उम्मेदवारी हो ।’
पौडेलले ०७४ को प्रतिनिधीसभा निर्वाचनमा नेपाली कांग्रेसका नेता प्रा.डा गोविन्दराज पोखरेललाई पराजित गरेकी थिइन् । उनले बामगठवन्धन (एमाले, माओवादी) को सहयोगमा चुनाव जितेकी हुन् । ०७४ मा बामठवन्धनबाट चुनाव जितेकी पौडेले अहिले फेरी पाँच दलीय गठवन्धनको सहयोगमा तेस्रोपटक प्यूठानबाट सांसद् बन्ने जोडबलमा छिन् । ०७० मा उनी कपिलवस्तुबाट समानुपातिक सांसद् बनेकी थिइन् । उनीसँगको प्रतिस्पर्धामा नेकपा एमालेका पोलिटब्यूरो सदस्य एवं प्यूठान जिल्ला इन्चार्ज सूर्य थापा छन् ।
पत्रकार भेटघाट कार्यक्रममा बोल्दै कांग्रेसबाट प्रदेश निर्वाचन क्षेत्र नम्वर २ का उम्मेदवार सरोज थापा (रोजा राणा) ले भालुवाङ–प्यूठान फराकिलो बनाउने, बेरोजगारीको अन्त्य गर्ने, बाग्दुलादेखि बाहाने सडक कालोपत्रे, झिमरुक र लुङ्ग खोलाको बीचमा हाइड्रोपावर, मल्लरानीलाई पर्यटन क्षेत्रका रुपमा बिकास गर्ने योजनाका साथ चुनावमा होमिएको योजना सुनाए । प्रदेश निर्वाचन क्षेत्र नम्वर १ का उम्मेदवार कृष्ण अधिकारी (प्रकाश) ले कृषि, उद्योग, पर्यटन र रोजगारी लगायतका एजेन्डा रहेको पत्रकार भेटघाटमा सुनाए ।
