प्यूठान : प्रतिनिधीसभा सदस्यमा प्यूठानबाट नेकपा एमालेका पोलिटब्यूरो सदस्य एवं प्यूठान जिल्ला इन्चार्ज सूर्य थापा र गठवन्धनबाट राजमोकी उपाध्यक्ष दुर्गा पौडेलको उमेदवारी परेको छ । प्रतिनिधीसभा सदस्यका लागि यहाँ एक मात्र निर्वाचन क्षेत्र छ । आइतवार मुख्य निर्वाचन अधिकृतको कार्यालय खलंगामा उमेदवारी दर्ता गरिएको हो । प्यूठानमा सत्ता गठवन्धन र नेकपा एमालेबीच प्रतिस्पर्धा छ । एमालेका उमेदवारहरुले तामझामका साथ उमेदवारी दर्ता गराएका थिए ।
पार्टी कार्यालय विजुवारबाट सदरमुकाम खलंगासम्म ¥याली निकालिएको थियो । प्रतिनिधी र प्रदेशका तीनै जना उमेदवारहरुद्धारा पार्टी कार्यालय विजुवारमा पार्टीका स्व. नेता नेता मदन भण्डारी, विजुवार मित्रमणी चोकमा शहिद मित्रमणी आचार्य र शहिद स्मृती पार्क गाँजुरीमा चार जना शहिदहरुको तस्विर र शालिकमा माल्यार्पण गरिएको थियो ।
एमालेका नेता सूर्य थापा पहिलोपटक प्यूठानबाट चुनाव लड्दै छन् । राष्ट्रिय राजनीतिमा उनको बोलियो प्रभाव मानिन्छ । उनमा तत्कालिन प्रधानमन्त्री झलनाथ खनाल र केपी शर्मा ओलीको प्रेस सल्लाहकारको रुपमा समेत जिम्मेवारी पुरा गरेको अनुभव छ । राजमोकी दुर्गा पौडेल ०७४ मा प्यूठानबाट निर्वाचित सांसद् हुन् ।
त्यसबेला उनलाई एमाले र माओवादी केन्द्रले साथ दिएका थिए । अहिले नेपाली कांग्रेस र माओवादीले साथ दिएका छन् । तर, ०७४ को बामगठवन्धनमा जस्तो बोलियो साथ अहिले उनलाई भएको देखिदैन् । पौडेल यसअघि कपिलवस्तुबाट समेत समानुपातिक सांसद् भएकी थिइन् ।
प्र्रदेशसभा सदस्यका लागि नेकपा एमालेबाट (क) निर्वाचन क्षेत्रमा पार्टीका निवर्तमान जिल्ला अध्यक्ष एवं प्रदेश कमिटी सदस्य तुल्सीराम शर्मा र बाम गठवन्धनबाट माओवादीका प्रदेश कमिटी सदस्य कृष्ण अधिकारी (प्रकाश)को उमेदवारी परेको छ ।
निर्वाचन क्षेत्र नम्वर (ख) मा एमालेबाट पार्टीका केन्द्रिय सदस्य एवं प्यूठान जिल्ला सह इन्चार्ज हरि प्रसाद रिजाल र कांग्रेसका रोज राणाको उमेदवारी परेको छ । रिजाल यसअघि (क) निर्वाचन क्षेत्रबाट प्रदेश सांसद् थिए । उनी लुम्विनी प्रदेश सरकारका पूर्व मन्त्री समेत हुन् । राणा कांग्रेसको क्षेत्रिय सभापती हुन् । राणा पहिलोपटक निर्वाचन लड्दै छन् ।
स्थानीय तह निर्वाचनमा प्यूठानमा एमालेले ३९ हजार ८ सय ७७, कांग्रेसले २१ हजार ५ सय ४६, माओवादीले १७ हजार १ सय ६३, जनमोर्चाले १३ हजार ६ सय १२ र समाजवादीले १ हजार ४ सय १७ मत लिएको छ ।
