प्यूठान : प्यूठानका नौ वटा स्थानीय तहमध्ये झिमरुक गाउँपालिका स्वास्थ्य क्षेत्रको कार्यसम्पादनका उत्कृष्ट भएको छ । प्रदेश स्वास्थ्य निर्देशनालयले दिएको मापदण्ड अनुसार स्वास्थ्य कार्यालय प्यूठानले गरेको मूल्यांकनका आधारमा झिमरुक उत्कृष्ट भएको हो ।
आर्थिक वर्ष २०७८÷०७९ को वर्षभरीमा गरिएको सेवा प्रवाह लगाएत विषयलाई समेटेर स्वास्थ्यले निश्चित सुचक तोकेको थियो । लक्ष्य अनुसार सूचकहरु झिमरुकले तोकिएको समयमा पुरा गरेको छ । कार्यसम्पादनका लागि प्रदेश र संघीय सरकारले स्थानीय तहलाई निश्चित सूचकहरु दिने गर्छ । स्वास्थ्य कार्यक्रमहरुको वार्षिक प्रगतीको मुख्य सूचकहरुको मूल्यांकनको आधारमा झिमरुक पहिलो भएको स्वास्थ्य कार्यालय प्यूठानले जनाएको छ ।
जिल्लामै उत्कृष्ट कार्यसम्पादन गरेकाले स्वास्थ्य कार्यालय प्यूठानले वार्षिक समिक्षा कार्यक्रमको अवसरमा गाउँपालिकालाई सम्मान गरेको हो । गाउँपालिका स्वास्थ्य शाखा प्रमुख सिनियर अहेव विकाश केसीलाई दोसल्ला र सम्मान पत्रले सम्मान गरियो । कामको मूल्यांकन गरेर पालिकालाई गरेको सम्मानले थप उत्साहित बनाएको स्वास्थ्य शाखा प्रमुख केसीले प्रतिक्रिया दिए । स्वास्थ्यले प्रत्येक वर्ष वार्षिक समिक्षामा सम्मान गर्ने गर्दछ ।
गाउँपालिकाले के ग¥यो नविनतम ?
झिमरुक जिल्लामै कम विवादमा आउने पालिकाभित्र पर्छ । विवाद कम भएकै कारण तोकिएका सूचकहरु पुरा गर्नका लागि पालिकालाई सहज भएको कार्यरत कर्मचारीहरु सुनाउँछन् । गाउँपालिकाले गत आर्थिक वर्षदेखि पालिकाभरी रहेका ८० वर्ष माथीका जेष्ठ नागरिकहरुलाई घरदैलोमा पुगेर स्वास्थ्य सेवा दिने गरेको छ । स्वास्थयकर्मीहरु घरमै पुगेर औषधी उपचार सेवा सहित उपाध्यक्ष कोशेली कार्यक्रम समेत वितरण गर्ने गरिएको स्वास्थ्य शाखा प्रमुख केसीले जानकारी दिए । उपाध्यक्ष कोशेली कार्यक्रम अन्तर्गत एक दर्जन विष्कुट, टाबेल, ग्लुकोज, नङ काट्ने मेशिन, सावुन, मसाज तेल लगाएत दैनिक उपभोग्य सामग्री प्रदान गरिन्छ ।
६० वर्षमाथीका जेष्ठ नागरिक र स्वयमसेविकाहरुलाई नगरेन्द्र गायत्री आँखा अस्पताल विजुवारको सहकार्यमा निःशुल्क आँखा उपचार सेवा दिइँदै केसीले जानकारी गराए । यसका लागि गाउँपालिकाले वर्षेनी झण्डै पाँच लाख रुपैयाँ बजेट विनियोजन गर्छ । मोतियाविन्दुको शल्यक्रिया सहितको आँखा उपचार सेवाबाट गाउँपालिकाका ४ सय ४ जना नागरिकहरु प्रत्यक्ष लाभांवित भएका छन् ।
गाउँपालिकामा दश जना व्यक्तिहरु एच.आई.भी संक्रमित छन् । संक्रमित व्यक्तिहरुलाई गाउँपालिकाले प्रत्येक वर्ष प्रति व्यक्ति १८ हजार रुपैयाँका दरले पोषण भत्ता उपलव्ध गराउने गर्दछ । पूर्ण प्रसुती जाँच र संस्थागत प्रसुतीमा बृद्धि गर्नका लागि सासुबुहारी अन्तरक्रिया कार्यक्रम ८ वटै वडामा संचालन हुन्छन् । यस कार्यक्रमले पूर्ण गर्भजाँचलाई समेत टेवा प¥याएको छ ।
ओखकोट स्वास्थ्यचौकीमा पोषण गृह पूनः स्थापना गरी सात जना कुपोषित बच्चाहरुलाई उपचार सेवामा ल्याइएको केसीले जानकारी दिए । पालिकाले कुपोषित बच्चाहरुको नियमित खोजी गरी उनीहरुलाई पोषण सामग्री, विऊपल र सरसफाईका सामग्री वितरण गर्ने गर्दछ । गतवर्षदेखि यो कार्यक्रम शुरु भएको हो ।
कर्मचारी र जनप्रतिनिधीबीचको समन्वयले समग्र स्वास्थ्य शाखामा प्रगती देखिएको प्रमुख प्रशासकीय अधिकृत शुवास रिजालले प्रतिक्रिया दिए । उनले स्वास्थ्यसँगै अन्य विषयगत क्षेत्रमा समेत गाउँपालिकाले देखिने गरी उपलव्धी हासिल गरेको दाबी गरे ।
गाउँपालिकामा पाँच वटा स्वास्थ्यचौकी, तीन वटा आधारभूत स्वास्थ्यकेन्द्र, २० वटा गाउँघर क्लिनिक, ५ वटा बर्थिङ सेन्टर र ४८ जना महिला स्वास्थ्य स्वयमसेविका छन् । बाँदीकोट स्वास्थ्यचौकी र भारतीय भूपु सैनिकले गरी दुई वटा एम्वुलेन्स संचालनमा रहेको स्वास्थ्य शाखाले जनाएको छ । (बुटवल टुडे)
