- उपचार नपाएर थलिए विक
- ओछ्यानमै दिसापिसाव
बांगेमरोठ (प्यूठान) : झिमरुक गाउँपालिका ४ बांगेमरोठ प्यूठानका सर्ब बहादुर विकलाइ पाँच जनाको परिवार पाल्ने एक्लो जिम्मेवारी काँधमा थियो । दश वर्ष भारतमा मजदुरी गर्दै आएका उनले जसोतसो मजदुरी गरेरै परिवार पाल्दै आए । एक दशक भारतमा विताउँदा पनि उनको जीवनशैली जस्ताको त्यस्तै थियो । घरपरिवार धान्नमै उनको आधा उमेर वित्यो । ५० वर्षिय विकलाइ भारतमा मजदुरी गदागर्दै ब्रेन ट्यूमर भयो । धन कमाउन गएका उनको उपचार संभव थियो । तर, आर्थिक अभावमा विरामीकै अवस्थामा घर फर्किन बाध्य भए । परिवारलाइ थप पीडा थपियो । परिवारलाइ घर खर्च चलाउनै गाह्रो भयो । श्रीमतीले जसोतसो छोराछोरीको पालनपोषण गर्दै आइन् । तर, श्रीमान्को उपचार गराउन सकिनन् ।
.jpg)
उपचार हुन नसकेपछि विकको मानसिक असन्तुलन गुम्यो । घरमा परिवारसँगै सुतेका उनी गत जेठ ४ गते एक्कासी उठेर बाहिर निस्किए । मानसिक रुपमा समेत विक्षिप्त बने । घरमै सुतिरहेको बेला उनी रातको १० बजे घरदेखि पारीको हल्देबारी भीरबाट लडे । परिवारले विहान तीन बजेपछि मात्र उनलाइ रुखको आडमा अड्किएको अवस्थामा फेला पारे । उनको दाइने खुट्टा भाँचियो ।
‘उपचार गर्न भैरहवा लग्यौ’,श्रीमती मीना विकले भनिन्,‘अस्पतालले पाँच लाख खर्च लाग्छ भनेपछि उपचारै नगरी घर फर्काएर ल्याए ।’ विक अहिले हिडडुल गर्न सक्दैनन् । मान्छे राम्रोसँग चिन्दैनन् । दिसापिसाव ओछ्यानमै गर्छन् । घरमुली नै ओछ्यानमै थलिएपछि विक परिवार पीडामा बाँचिरहेको छ ।
.jpg)
श्रीमानको उपचार गर्न नसकेपछि उनी पीडामा छिन् । घरमा भएका दुइ छोरीले बुवाको दिसापिसाव सोर्हछन् । एक मात्र छोरा परिवार धान्नका लागि भारतमा छन् । पढ्दै गरेका छोरा बुवाको अवस्था विग्रिएपछि मुग्लान छिरेका हुन् । विकको दाइने खुट्टा पूर्ण रुपमा चल्दैन् । घरमा आएका मान्छेलाइ उनी चिन्दैनन् । राम्रोसँग भित्रबाहिर गर्न सक्दैनन् । घर आउनेसँग उनी बेहोसमै कुरा गर्छन् ।
भीरबाट लडेर पाँच महिनादेखि अशक्त भएका उनको अपांग परिचयपत्र बनेको छैन् । पूर्ण अपांगताको सूचिमा पर्ने उनको अवस्था भएपनि परिचयपत्र बनाउनतर्फ कसैले चासो देखाएका छैनन् । उपचार संभव भएपनि तत्कालै आर्थिक अभाव भएकाले घरमै थलिएका श्रीमानको अवस्था हेरेर दिन भुलाउनुपरेको मिनाले दुःखेसो पोखिन् । ‘छोरा भर्खरै इण्डिया गएको छ’,उनले भनिन्,‘ऋण लागे छोराले विस्तारै कमाएर तिर्ला । तर, अहिले श्रीमान्को उपचार गर्ने अवस्था भएन ।’
