मोहम्मद हलिम हलुवाई
निर्वाचन परिचालन कमिटी संयोजक
नेकपा एमाले सरूमारानी गाँउपालिका प्यूठान
चुनावले गाउँघर तातेको छ । जिल्लाको दक्षिणी भेगमा अवस्थित सरुमारानी गाउँपालिकामा पनि चुनावी रौनक दिनानुदिन बढ्दो छ । यहाँ मूलतः नेकपा एमाले र गठबन्धनदलबीच नै मुख्य प्रतिस्पर्धा हुने देखिन्छ । एमालेको तर्फबाट निवर्तमान गाउँपालिका अध्यक्ष झग बहादुर विश्वकर्मा र गठबन्धनदलबाट साझा उम्मेदवारको रूपमा कांग्रेस नेता मुकुन्दराज शर्मा गाउँपालिका अध्यक्ष पदका लागि चुनावी मैदानमा छन् । नेकपा एमालेले कसरी चुनावी गतिविधिलाई अगाडी बढाइरहेको छ ? जित्ने आधार के हुन् ? लगाएत विषयमा आजको पोष्टका वरिष्ठ संवाददाता प्यार अलि खाँनले एमाले सरुमारानीका निर्वाचन परिचालन कमिटी संयोजक, चुनावी कमाण्डर मोहम्मद हलिम हलुवाईसंग गरेको कुराकानीको सार संक्षप :
- एमाले सरुमारानीको निर्वाचन परिचालन कमिटीको संयोजक हुनुहुन्छ, पार्टीलाई कसरी परिचालन गर्दै हुनुहुन्छ ?
हामीले पार्टीको तर्फदेखि अगाडी सारेका उम्मेदवारहरुलाई वडाका सबै टोलटोलमा टोलभेला गराई उपस्थित गराउने, पार्टीको नीति बिचार र निर्वाचन पश्चात जनताको हितमा गर्न सकिने कुराहरुलाई मात्र आश्वासन दिँदै विश्वस्त पार्दै अघि बढेका छौं । जति सकिन्छ धेरै भन्दा धेरै टोलबस्तीहरुमा उमेदवार सहित पार्टिका सबै नेता तथा कार्यकर्ताहरुलाई परिचालन गर्ने आरोप प्रत्यारोप र झडपको अबस्था हाम्रो तर्फदेखि आउन नदिने, निर्वाचन आचारसंहिताको पूर्णपालना गर्नेगरि निर्वाचनमा जनताको मन जितेर आफ्नो पक्षमा मतदान गराउने प्रती हामी सजग छौं । निर्वाचन आचारसंहिता विपरीत भोजभतेर गरेर, पैसाको प्रलोभनमा पारेर अराजनैतिक गतिविधि हाम्रो रुचिका विषय होइनन् । हामी हाम्रो पार्टीलाई लोकतान्त्रिक स्वस्थ प्रतिस्पर्धाको विधिबाट सिंगो पार्टी पंक्ति यो महाअभियानमा जोडिएका छौं ।
- गठबन्धनको चुनौतीलाई कसरी सामना गर्दै हुनुहुन्छ ?
यो गठबन्धनलाई नेकपा एमालेले चुनौतीको रुपमा लिएकै छैन । सरुमारानीमा मसाल, समाजबादी केवल नाम मात्रका पार्टी हुन । यहाँ विशेष गरेर नेपाली कांग्रेस र माओबादी केन्द्रको केहि उपस्थिति भने अवश्य नै छ । पहिलो स्थानीय तहको निर्वाचनमा कांग्रेस तथा माओवादीले एक÷एक वडा जितेको अवस्था हो । अहिलेको अवस्थामा घटनाक्रम फेरिएको छ । नेपाली कांग्रेस र माओवादी केन्द्रको मूल नेतृत्वमा रहेर काम गरेका होनहार अगुवा नेता तथा कार्यकर्ताहरुको पंक्ति हाम्रो पार्टीमा प्रवेश गरेको अवस्था छ । हाम्रो पार्टीमा दिनानुदिन पार्टी प्रवेशको लहर बढ्दो छ । कांग्रेस क्षेत्रिय उपसभापती जैनुल मिया, कांग्रेस क्षेत्रिय सदस्य हकित मिया, कांग्रेस पालिका कमिटीका उपसभापती पुष्पराज न्यौपाने, सचिव जागेश्वर पोखरेल, सहसचिव कल्पना सुनार, वडा न ५ का वडा सभापती सहित दर्जन भन्दा धेरै अगुवा कार्यकर्ताहरु नेकपा एमालेमा समाहित भएको विद्यमान अवस्था छ । एमालेको बलियो संगठन, २०७४ सालको स्थानीय तहको निर्वाचनबाट निर्वाचित जनप्रतिनिधिहरुको जनपक्षीय काम, एमाले नेतृत्वको गाउँ सरकारले सुशासनको पक्षमा, सामाजिक, आर्थिक तथा भौतिक पूर्वाधार विकासमा गरेका कामहरूका कारणले हामी जनता माझ हरदम हरपल नजिक रहँदै आएका छौं । गठबन्धन समृद्धि र विकासका लागि होइन मिलिभगतको लागि हो भन्ने कुरा अति सामान्य जनताले पनि बुझिसकेका छन् । तगठबन्धन दलहरुको तर्फबाट गरिएका भ्रमका खेतीहरुलाई उजागर गर्दै हामी बस्ती बस्तीमा अघि बढेका छौं ।
- एमालेले निर्वाचन जित्ने आधारहरू के के हुन् ?
मुलकुरा नेकपा एमालेको सङ्गठन चुस्त छ । जनतामा आधारित हाम्रा जनसंगठनहरु क्रियाशील रहेका छन् । एमालेले गरेका जनपक्षीय कामहरुलाई सरूमारानीका जनताहरूले नजिकबाट नियालिरहेका छन् । एमालेका विरुद्ध विपक्षीहरुले गर्ने कुप्रचारलाई हामीले तोड्दै आएका छौं । जनतासंग एमालेको बलियो जनगठबन्धन रहँदै आएको छ । जनताको पक्षमा नभएर लोभीपापीहरुले व्यक्तिगत स्वार्थका लागि गरेको गठबन्धन भन्ने कुराको बुझाई तल्लो तहको जनता माझ पुगिसकेको छ । आफ्नो स्वार्थ पुरा गर्न तथा सत्ता प्राप्तीको निम्ति गठबन्धनले समावेशी तथा समानुपातिक प्रतिनिधित्वको सवाललाई तिलाञ्जली दिएको छ । जनताको नजिकको सरकारको रूपमा रहेको स्थानीय तहमा अध्यक्ष, उपाध्यक्ष मध्ये एक जना महिला हुनुपर्ने कानुनी व्यवस्थालाई लत्याउँदै गठबन्धनले पुरुष उम्मेदवार अघि सारेको छ । सरुमारानीका महिला दिदिबहिनीहरुले यो कुरालाई किमार्थ नजर अन्दाज गर्नै सक्दैनन् । हामीले हाम्रो पार्टीको तर्फबाट भूगोलको समेत सन्तुलन मिलाउँदै समावेशी चरित्रको उत्कृष्ठ नमूना प्रस्तुत गर्दै गाउँपालिका अध्यक्ष, उपाध्यक्ष ६ वटै वडाका वडा अध्यक्ष, वडा सदस्यहरुलाई निर्वाचनमा अघि सारेका छौं । जनपक्षीय, लोकप्रिय उम्मेदवारहरुको उम्मेदवारीका कारण हाम्रो पार्टीले निर्वाचन जित्ने आधारहरु हुनसक्दछन् ।
योग्य, सक्षम, भिजन भएको नेता, एकपटक गाउँपालिका अध्यक्ष भइसकेको अनुभवी पाको नेतृत्व, एमाले प्यूठानको उपाध्यक्ष समेत रहनुभएका झग बहादुर विश्वकर्माको नेतृत्वमा हामी निर्वाचनमा होमिएका छौं । यसपटक पनि एमालेले पूनः निर्वाचन जित्ने कुरामा कुनै शंका छैन् । गाँउ वस्तीहुँदै समृद्ध तथा समुन्नत गाउँपालिका बनाउने पार्टी एमाले नै हो, एमालेले नै गर्छ भन्ने दृढ विश्वास, आशा अनि भरोसा जनताहरूले गर्दै आएको भन्ने हाम्रो पार्टीको बुझाई छ ।
