प्यूठान : सामाजिक संजाल प्रयोगकर्ताहरुलाई आफ्नो बारेमा कुप्रचार एवं भ्रमको खेती नगर्न एमाले प्यूठानका नवनिर्वाचित अध्यक्ष विजय विराज बिष्टले आग्रह गरेका छन् । नेकपा एमाले पोलिटब्यूरो सदस्य एवं प्यूठान इन्चार्ज सूर्य थापा र आफ्नो सम्बन्ध एव भूमिकालाई जोडेर केहि सामाजिक संजाल प्रयोगकर्ताको भ्रमपूर्ण टिप्पणीप्रती आफू आश्चर्य चकित परेको बिष्टले प्रतिक्रिया दिए ।
‘म जनताको बहुदलीय जनवादलाई मार्गदर्शक सिद्दान्तको रूपमा अंगिकरण गर्दछु’ आजको पोष्टसँग टेलिफोनमा कुरागर्दै उनले भने, ‘तत्कालीन पार्टी एकता राष्ट्रिय अभियानबाट एमालेमा आउनु भनेको एमालेको नीति तथा विचार सिद्दान्तप्रती म पूर्ण रूपमा वफादार एवम् प्रतिबद्ध रहँदै आएको कुरा सवैलाई सर्वविदितै छ ।’ एमालेबाट टुक्रिएर बनेको समाजवादी पार्टीको कार्यदिशा, कार्ययोजना तथा सिद्धान्तप्रती आफू कहिल्यै पनि सहमत हुन नसक्ने उनले ठोकुवा गरे ।
प्यूठान इन्चार्ज नेता सूर्य थापाको भूमिका अत्यन्तै व्यवहारिक तथा सन्तुलित रहेको समेत बिष्टले सुनाए ।
प्यूठानको पार्टी नेतृत्व चयनमा जनताको बहुदलीय जनवादको मर्म अनुरूप नै प्रतिनिधिको सार्वभौम अधिकारको समुन्नत अभ्यासबाट भएको नेतृत्व चयनमा इन्चार्ज सूर्य थापाको भूमिका अत्यन्तै व्यवहारिक तथा सन्तुलित रहेको समेत बिष्टले सुनाए । ‘सर्वसम्मतका नाममा पार्टीलाई हिजोको गतिमा पनि पकड्न नसक्ने गरि नेतृत्वमा आएका आकांक्षीहरुलाई थापाले रोक्ने भूमिका निर्वाह गर्नुभएको हो ।’ बिष्टले भने, ‘भूगोल बुझेको, कार्यकर्ताको मनोविज्ञान बुझ्न सक्ने नेतृत्व आउनुपर्नेमा उहाँको जोड थियो । जसको प्रतिनिधित्व हामीले गर्ने शौभाग्य पायौँ । ’
नेता थापा र आफूहरुको बीचमा कुनै समस्या र अन्तरविरोध नभएको समेत उनले प्रष्ट पारे । कतिपय विपक्षी दलका नेता, कार्यकर्ताहरुले सामाजिक सञ्जालमा लेखेको टिप्पणीप्रति उनले आपत्ती जनाए । प्यूठानीका सवै घरघर र मनमान एमाले बसाल्नुपर्ने मुख्य कार्यभारी आफूहरुको काँधमा आएकाले कुशलतापूर्वक पुरा गर्ने समेत उनले सुनाए ।
.jpg)
घुमुवा डुलुवाको प्रचारवाजी : थापा
एमाले पोलिटब्यूरो सदस्य एवं प्यूठान इन्चार्ज सूर्य थापाले कतिपय ‘घुमुवा–डुलुवा’ले आफूहरुको बारेमा अनर्गल प्रचारबाजी गर्न खोजिरहेको बताए । उनले प्यूठानमा अव नेकपा एमाले अझ शसक्त भएर अघि बढ्ने समेत उल्लेख गरे । ‘एमालेको शक्तिलाई सहन नसकेर कतिपय घुमुवा डुलुवाहरुको कामै जथाभावी लेख्ने छ’,उनले भने,‘यसले हाम्रो पार्टी र नेतृत्वलाई कुनै असर गर्दैन् ।’ नेता थापाले नेता कार्यकर्ताहरुलाई कुनै पनि भ्रममा नपर्न आग्रह समेत गरे ।
